Mae House of the Dragon yn un o gyfresi mwyaf HBO. Mae’n gynhyrchiad rhyngwladol mawr sydd wedi ffilmio mewn sawl lleoliad yn Sbaen, Portiwgal a’r DU, gyda’i brif ganolfan gynhyrchu yn Warner Bros. Studios Leavesden.

Roedd sicrhau cyfnod ffilmio pum wythnos gan HBO ar gyfer House of the Dragon Tymor 2 yn 2023 yn gamp sylweddol i Gymru, gan greu cyfleoedd ac amlygrwydd rhyngwladol i ddiwydiant sgrin Cymru.

Yn dilyn llwyddiant Tymor 2, dychwelodd HBO i Gymru i ffilmio'r bennod nesaf, House of the Dragon Tymor 3.

Cynhaliwyd y ffilmio unwaith eto mewn lleoliadau ledled Gogledd Cymru, gan drawsnewid tirweddau dramatig y rhanbarth yn fyd ffuglennol Westeros. Darllenwch ymlaen i ddarganfod sut, gyda'n cefnogaeth ni, y gwnaeth y cynhyrchiad greu swyddi, lleoliadau hyfforddeion a chyfleoedd datblygu sgiliau yn yr ardal.

Pam fod Cymru'n addas fel Westeros

Mae Cymru'n dod yn gyrchfan o ddewis ar gyfer cynyrchiadau ffilm a theledu cartref a rhyngwladol, diolch i gyfuniad o leoliadau trawiadol, criwiau profiadol a chefnogaeth gynhyrchu wedi'i deilwra.

Ar gyfer House of the Dragon, roedd tirweddau Ynys Môn, Gwynedd ac Eryri yn cynnig y raddfa a'r awyrgylch angenrheidiol i ddod â Westeros yn fyw. Roedd arfordiroedd garw, traethau ysgubol, chwareli dramatig a golygfeydd mynyddig yn gefndir perffaith ar gyfer un o gynyrchiadau mwyaf y byd teledu.

Fe wnaeth y tîm cynhyrchu gydnabod nid yn unig apêl weledol Cymru, ond hefyd y gefnogaeth sydd ar gael ar lawr gwlad trwy ein gwasanaeth Sgrin Cymru a'n Cyllid Cynhyrchu.

Ble mae'r union leoliadau? Nid ydym am chwalu'r hud, ond digon yw dweud nad oes rhaid i ymwelwyr ag Ynys Môn a Gwynedd fynd yn bell i weld y tirweddau garw a hardd a ddefnyddiwyd yn y gyfres.

Roedd hi’n wych cael ffilmio yng Nghymru, gyda’i golygfeydd a’i thirweddau syfrdanol. Mae wirioneddol yn dod â Westeros yn fyw. Roeddwn i’n awyddus iawn i fynd â House of the Dragon yno. Roedden ni’n gwybod y byddai’r gefnogaeth gan y Llywodraeth a’r bobl leol yn ein helpu ni i gael deunydd ffilm rhyfeddol.Diolch o galon, Cymru!”

Kevin De La Noy, Cynhyrchydd Gweithredol, House of the Dragon (HBO)

Cefnogi cynhyrchiad byd-eang i ffilmio yng Nghymru

Mae sicrhau ein bod yn denu cynyrchiadau rhyngwladol mawr yn gofyn am fwy na lleoliadau gwych. Mae angen cymorth ariannol, arbenigedd diwydiant a mynediad at dalent leol brofiadol.

Trwy ein Cyllid Cynhyrchu a gwasanaeth Sgrin Cymru, buom yn gweithio'n agos gyda HBO i helpu i ddarparu ffilmio ledled Gogledd Cymru. Roedd ein cefnogaeth yn cynnwys cyllid cynhyrchu, cyngor ar leoliadau, a chysylltiadau â rhwydweithiau criwiau lleol, gan helpu i sicrhau y gallai'r cynhyrchiad wneud y mwyaf o'i uchelgeisiau creadigol a'i fuddsoddiad yng Nghymru.

Disgwylir i'n buddsoddiad yn y drydedd gyfres gynhyrchu £6.7 miliwn i economi Cymru ac atgyfnerthu enw da Cymru fel cyrchfan gynhyrchu flaenllaw.

Creu cyfleoedd i dalent o Gymru

Yn ystod y gwaith o ffilmio'r ail gyfres, cyflogwyd mwy na 250 o bobl leol mewn rolau cynhyrchu. Gan weithio ochr yn ochr â phartneriaid gan gynnwys CrewHQ a Warner Bros. Studios, fe wnaethom hefyd helpu i gefnogi cyfleoedd hyfforddi a datblygu i fwy na 30 o bobl drwy leoliadau lefel mynediad ac uwchsgilio.

Pan ddychwelodd HBO i Gymru ar gyfer y drydedd gyfres, parhaodd y cyfleoedd. Crëwyd deuddeg lleoliad â thâl ar gyfer hyfforddeion mewn amrywiol adrannau, gan gynnwys gwisgoedd, camera, sain, propiau ac addurno set. Cymerodd pump o bobl eraill ran mewn lleoliadau uwchsgilio, tra bod chwe pherson wedi ymuno â'r cynllun cysgodi First Break. Cyflwynwyd yr holl leoliadau drwy Cynghrair Sgrin Cymru, Screen Skills, Sgil Cymru a CrewHQ. <link to Aaron article>

RRoedd y cynhyrchiad hefyd yn cefnogi sesiynau Cymraeg ar gyfer aelodau'r criw a bwt-camp Location Marsials, gan helpu pobl leol i ddatblygu sgiliau a chael mynediad at gyfleoedd cyflogaeth yn y dyfodol.

Gyda'i gilydd, mae'r mentrau hyn yn helpu i gryfhau talent y sector sgrin yng Nghymru nawr ac ar gyfer y dyfodol, gan sicrhau bod criwiau a hyfforddeion lleol yn gallu datblygu gyrfaoedd cynaliadwy.

Datblygu sector sgrin Cymru ar gyfer y dyfodol

Darlledwyd Tymor 2 yn ystod haf 2024, gan ddenu dros saith miliwn o wylwyr ar gyfer y bennod olaf a rhoi Cymru ar lwyfan y byd. Mae Tymor 3 yn cael ei ffrydio ar HBO Max ar hyn o bryd, ac mae'n parhau i fod yn un o gyfresi mwyaf poblogaidd y rhwydwaith.

Drwy ddenu cynyrchiadau rhyngwladol a sicrhau buddsoddiad parhaus gyda'n lleoliadau o safon fyd-eang a'n cymorth cynhyrchu, rydym yn helpu i greu swyddi, cefnogi datblygiad sgiliau a thyfu'r diwydiant teledu a ffilm yng Nghymru.

Straeon cysylltiedig