Mae ymchwil a datblygu’n hanfodol i dwf y diwydiannau creadigol – a Clwstwr yw ei ganolbwynt yn Ne Cymru. Mae’r rhaglen yn darparu cyllid allweddol ar gyfer prosiectau ymchwil a datblygu ar draws y wlad, gan hybu datblygiad prosiectau newydd, gwasanaethau a phrofiadau i’n sector sgrîn sy’n ffynnu.
Mae'n rhaglen flaengar sydd â nod uchelgeisiol: symud sector sgrîn Cymru o safle o gryfder i safle o arweinyddiaeth.
Mae Clwstwr yn rhoi'r amser, gofod a chyllid i gwmnïau o Gymru wir ymwneud ag ymchwil a datblygu. Mae hyn yn rhoi gwell chwarae teg i gwmnïau annibynnol, busnesau bach a chanolig, microfusnesau a gweithwyr llawrydd, trwy greu llwyfan iddynt gystadlu â chwmnïau cyfryngau byd-eang. Mae Clwstwr hefyd yn darparu cyngor arbenigol, gan rannu gwybodaeth a hyfforddiant gwerthfawr mewn meysydd fel datblygu busnes a dylunio, gan dynnu ar brofiad academyddion a gweithwyr proffesiynol yn y diwydiant.
Rhwng 2019 a 2022, dyfarnodd Clwstwr gyllid i 118 o brosiectau arloesi, dan arweiniad cwmnïau ffilm a theledu, busnesau technoleg, sefydliadau creadigol a gweithwyr llawrydd. Mae’r gefnogaeth hon wedi eu galluogi i ymchwilio a datblygu syniadau newydd mewn prosiectau sydd wedi cael effaith economaidd, gymdeithasol a diwylliannol gadarnhaol ar y sector a’r rhanbarth.
Fel llawer o brosiectau ar draws sectorau creadigol Cymru, mae Clwstwr yn ymdrech gydweithredol. Mae’n rhan o raglen clystyrau diwydiannau creadigol y DU (Creative Industries Clusters Programme), a ariennir gan y Gronfa Her y Strategaeth Ddiwydiannol (Industrial Strategy Challenge Fund). Mae’r rhaglen yn cael ei darparu gan Gyngor Ymchwil y Celfyddydau a'r Dyniaethau (Arts and Humanities Research Council) ar ran Ymchwil ac Arloesedd y DU (UK Research and Innovation) gyda’r diwydiant a’r byd academaidd – Phrifysgol Caerdydd, Prifysgol Fetropolitan Caerdydd a Phrifysgol De Cymru – yn cydweithio’n agos.
Yn Cymru Greadigol, rydym yn falch o fod yn gyllidwr allweddol i’r rhaglen, gan gefnogi ei huchelgais i alluogi busnesau Cymreig i gystadlu gyda’r gorau yn y byd. Gan weithio’n agos gyda Clwstwr, rydym wedi gallu rhannu arbenigedd diwydiant, hwyluso cysylltiadau a chyflwyniadau, a chodi ymwybyddiaeth o’r gefnogaeth R&D sydd ar gael.
Er bod pum mlynedd o weithrediad Clwstwr yn dod i ben yn 2023, bydd y gwaith yn cael ei ddatblygu ymhellach gan Media Cymru, rhaglen arolesi newydd a gefnogir gan y Gronfa Cryfder mewn Lleoedd. Mae'r rhaglen fuddsoddi strategol hon yn dod â 23 o bartneriaid cynhyrchu cyfryngau, darlledu, technoleg, prifysgolion ac arweinyddiaeth leol ynghyd – gan gynnwys ni yma yn Cymru Greadigol – i ddatblygu canolbwynt byd-eang ar gyfer arloesi yn y cyfryngau.
Drwy Media Cymru, bydd cynnydd yn cael ei wneud mewn meysydd fel cynhyrchu rhithwir, seilwaith digidol, cyflawni sero-net, a chydraddoldeb, amrywiaeth a chynhwysiant. Dyma’r cam diweddaraf ar ein taith tuag at ddiwylliant o arloesi parhaus – lle mae R&D bob amser wrth wraidd cynhyrchu.
Beth yw'r diweddaraf?
- Mae Clwstwr wedi buddsoddi mwy na £3 miliwn yn uniongyrchol i’r sectorau newyddion a sgrîn yng Nghymru ar gyfer ymchwil a datblygu ac i annog arloesedd, yn ogystal â datblygu cynnyrch, gwasanaethau a phrofiadau newydd.
- Mae Clwstwr wedi creu rhwydwaith gyda mwy na 1000 o sefydliadau o Gymru a thu hwnt. Mae hyn yn helpu i gysylltu cwmnïau, gweithwyr llawrydd, arbenigwyr a byd addysg.
- Roedd Clwstwr yn brosiect uchelgeisiol a ddaeth i ben yn 2023. Dros ei bum mlynedd, cefnogodd ac ariannodd 118 o brosiectau arloesi yn y diwydiannau creadigol yng Nghymru.
- Dangosodd adroddiad fod prosiectau a ariennir gan Glwstwr wedi cyfrannu at fwy na £20 miliwn o drosiant ychwanegol, yn ogystal â chreu dros 400 o swyddi newydd yn y diwydiannau creadigol.