Fy enw yw Robyn ac rwy’n gynhyrchydd a rheolwr marchnata yn Bomper Studio, stiwdio cynhyrchu greadigol annibynnol wedi’i lleoli yng Nghaerffili – gyferbyn â’r castell, sy’n olygfa braf o’r swyddfa. Rwy’n dod o Goed Duon yn wreiddiol ond astudiais farchnata yn y brifysgol ym Mryste cyn mynd i weithio i stiwdio stop-motion yng Nghaint. Roeddwn wastad eisiau symud yn ôl i Gymru i fyw a gweithio.
Fy swydd yw goruchwylio cynhyrchu a gweithio'n agos gyda'r timau creadigol i sicrhau bod gan bawb yr hyn maent ei angen a bod pob prosiect y gorau allai fod. Rhan o fy swydd yw darganfod cyfleoedd newydd a chynnal perthynas gyda chleientiaid, partneriaid, cyflenwyr a gweithwyr llawrydd. Gan ei fod yn stiwdio fach, yn aml mae'n rhaid gwneud sawl rôl, felly fi yw'r rheolwr marchnata hefyd, yn datblygu'r strategaeth farchnata ac yn goruchwylio brand y stiwdio.
Rydym yn creu gwaith gwreiddiol sy'n llawn cymeriad ar gyfer darlledu, brandio, hysbysebu a fideos cerddoriaeth yn Bomper. Rydym yn gweithio'n bennaf ym maes animeiddio CG ac yn gwneud ychydig o waith VFX mewn 2D. Syniadau sy’n gyrru’r stiwdio, yn hytrach na steil arbennig - sy’n gwneud y stiwdio ychydig yn wahanol. Mae'r agwedd yma yn ein gwneud yn fwy rhydd - mae'n ein galluogi i ddarganfod gwahanol fath o gynnwys. Mae ein diwylliant yn seiliedig ar y chwilfrydedd cynhenid hwn.
Mae 11 ohonom yn gweithio llawn amser ond gyda gweithwyr llawrydd, yn aml rydym yn dîm o tua 30 o bobl. Fel arfer mae gennym un neu ddau o gynyrchiadau mawr ac yna rhai llai. Rydym yn gwneud llawer o waith hysbysebu ar gyfer brandiau fel Mitsubishi a Levi's ac rydym wedi gweithio ar ambell gyfres i BBC Bitesize. Rydym wedi gwneud fideos cerddoriaeth yn ddiweddar, gan gynnwys dau gyda'r Foo Fighters.
Rwy’n aml yn pinsio fy hun bod gen i fy swydd ddelfrydol a’i bod yng Nghymru. Mae pobl wir wedi dechrau edrych tuag at sector creadigol Cymru yn ystod y 10 mlynedd diwethaf. Doeddwn i ddim yn meddwl y byddwn yn gallu cael swydd yng Nghymru gan fod y diwydiant creadigol i’w weld yn sownd mewn swigen yn Llundain, er bod arbrofi a dyfeisgarwch bob amser wedi bod yn asgwrn cefn i’r sector y tu allan i Lundain. Dwi wrth fy modd gyda’r ffaith mod i’n gallu bod ar alwad gyda Sony yn Efrog Newydd ac wedyn am bump o’r gloch dwi’n cerdded i fyny’r mynydd ger fy nhŷ gyda fy nghi.
Rydym wedi cael llawer o gefnogaeth gan Cymru Greadigol. Aethon ar daith fasnach i San Francisco ychydig yn ôl ac maen nhw bob amser yn ein gwahodd i ddigwyddiadau, arddangosiadau a chynadleddau. Mae ganddyn nhw hefyd gymaint o gyfleoedd ariannu gwahanol ac maen nhw’n cynnig cymorth mor dda. Os oes gennych gwestiwn, p'un a yw'n farchnad newydd, am fuddsoddi, neu i gysylltu â stiwdio arall, maen nhw bob amser wedi ein helpu ni. Mae’r cymorth a chyngor wedi ein galluogi i dyfu. Mae wedi bod yn anhygoel gweld esblygiad Bomper ers i mi ymuno yn 2018.
Rydyn ni'n gweithio ar lawer o brosiectau cyfrinachol ar hyn o bryd, gan gynnwys un gyda chwmni gemau mawr, sydd i'w gyhoeddi'n fuan. Gyda thîm hynod dalentog gydag ystod amrywiol o ddiddordebau, rydym bob amser yn chwilio am her ac yn annog chwilfrydedd. Nid oes unrhyw ddiwrnod gwaith yr un peth yn Bomper ac rwy'n gyffrous iawn am yr hyn y byddwn yn gweithio arno ac yn ei gyflawni yn y dyfodol.
I glywed mwy am Bomper Studio a rhai o'r prosiectau maen nhw wedi gweithio arnyn nhw, ewch i'w gwefan: https://bomperstudio.com/work